ល្បែងអុក ឬចត្រង្គ មានដើមកំណើតតាំងពីមុនសម័យពុទ្ធកាលមកម្ល៉េះ ដែលបុរាណហៅថា ល្បែង បាសកា ធ្លាប់មានតំណាលក្នុងអក្សរសិល្ប៍ខ្មែរ និងមានរូបចម្លាក់នៅតាមប្រាសាទនានាជាភ័ស្តុតាង ស្រាប់។ អុកចត្រង្គ ជាល្បែងកម្សាន្តមួយប្រភេទដែលជួយបង្កើននូវបញ្ញា ហើយអ្នកដែលចូលចិត្ត លេងអុកចត្រង្គនេះ ភាគច្រើនជាមន្រ្តីអ្នកដឹកនាំប្រទេស និងមេទ័ពកំពូលៗ។​ ប្រជាជនខ្មែរនិយម ចូលចិត្តលេងអុកនេះណាស់ ព្រោះថាការលេងអុកនេះ គឺមិនខុសពីយុទ្ធសាស្រ្តក្នុងការរៀបចំក្បួនទ័ព ក្នុងការធ្វើសឹក​សង្រ្គាមនោះទេ អ្វីដែលសំខាន់នោះ នៅពេលគូសត្រូវវាយលុកចូលមក តើត្រូវទប់ទល់ និងការពារខ្លួនដោយវិធីណា ហើយនៅពេលដៃគូសត្រូវព័ទ្ធជាប់​ តើត្រូវដោះស្រាយបញ្ហា ឬត្រូវធ្វើ ដូចម្តេចដើម្បីរកច្រកចេញអោយរួច។​ អ្នកដែលពូកែលេងអុក ត្រូវបានគេចាត់ទុកថា ជាមនុស្ស មានប្រាជ្ញាឆ្លាតវៃ។ នៅស្រុកខ្មែរមានអ្នកពូកែលេងអុកជាច្រើននាក់ ដែលក្នុងការប្រកួតអុកកម្រិត ថ្នាក់ជាតិក្នុងឆ្នាំនេះ ចំណាត់ថ្នាក់លេខមួយបានទៅលើ លោក ឆយ វីរ៉ា ដែលជាអ្នកគ្រប់គ្រងតំណែង ស្តេចអុកប្រចាំស្រុកខ្មែររហូតដល់ពីរអាណត្តិទៅហើយ។